សម្តេចក្រឡាហោម ស ខេង សម្តែងការស្វាគមន៍ក្នុងការបន្តអនុស្សារណៈយោគយោល់គ្នាជាមួយក្រុមហ៊ុនជប៉ុនដែលចង់មកវិនិយោគនៅកម្ពុជា
នារសៀលថ្ងៃពុធ ទី២១ ខែកញ្ញា ឆ្នាំ២០២២ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានអនុញ្ញាតឱ្យលោក OKUBO Hideo ស្ថាបនិកមូលនិធិCIESF ចូលជួបសម្តែង ការគួរសម។
ជាកិច្ចចាប់ផ្តើមលោក OKUBO Hideo បានថ្លែងអំណរគុណចំពោះ សម្តេចក្រឡាហោម ដែលបានទទួលជួបរូបលោក ដោយក្នុងជំនួបនេះលោកមានគោលបំណងស្នើសុំបន្តអនុស្សារណៈយោគយល់គ្នារយៈពេល១០ឆ្នាំទៅមុខទៀត រវាងក្រុមហ៊ុន ESS (E SECURITY SERVICES CO.,LTD) ជាមួយ ក្រសួងមហាផ្ទៃ ខណៈដែលអនុស្សារណៈនេះនឹងផុតកំណត់នៅអំឡុងខែតុលា ឆ្នាំ២០២២ខាងមុខ នេះ។
លោក OKUBO Hideo បានបន្ថែមថាគិតមកទល់ពេលនេះ ក្រុមហ៊ុន ESS បានផ្តល់សេវាជូន ដល់ អតិថិជនកម្ពុជាបានចំនួន១៣០៥កុងត្រាក្នុងការផ្តល់សេវាកម្មព័ត៌មានសន្តិសុខរយៈពេល២៤ម៉ោង ដែលភាគច្រើនសេវាកម្មនេះច្រើនជាងគេគឺរស់នៅក្នុងទីក្រុងភ្នំពេញ។ លោកបន្តថាក្នុងរយៈពេល១០ឆ្នាំកន្លងមកក្រុមហ៊ុនបានដោះស្រាយឧបតិវហេតុជូនដល់ពលរដ្ឋចំនួន២៩៣ករណីដែលមានករណី ចោរកម្មអគ្គីភ័យ គ្រោះទឹកជំនន់ សង្គ្រោះបន្ទាន់ ក្នុងនោះ៤៦ករណីបានទទួលកិច្ចសហប្រតិបត្តិការជាមួយអាជ្ញាធរប៉ូលីស ដែលធ្វើឱ្យប៉ះពាល់ដល់ទ្រព្យសម្បតិ្តរបស់អតិថិជន។
ជាការឆ្លើយតបសម្តេចក្រឡាហោម ស ខេង បានសម្តែងការស្វាគមន៍ចំពោះលោក OKUBO Hideo និងកោតសរសើរចំពោះសមទ្ធិផលដែលក្រុមហ៊ុនទទួលបានក្នុងរយៈពេល១០ឆ្នាំកន្លងមក ដែលក្រុមហ៊ុនបានចូលរួមមួយផ្នែកនៅក្នុងកិច្ចការងាររក្សាសុវត្ថិភាពនៅក្នុងព្រះរាជាណាចក្រកម្ពុជា។ ទន្ទឹមនឹងនេះ ក្រុមហ៊ុនបានសហការយ៉ាងជិតស្និតជាមួយអាជ្ញាធរប៉ូលីស។
ពាក់ព័ន្ធទៅនឹងសំណើរសុំបន្តអនុស្សារណៈយោគយល់គ្នារវាងក្រុមហ៊ុន និងក្រសួងមហាផ្ទៃ សម្តេចក្រឡាហោម បានសម្តែងការស្វាគមន៍ និងស្នើឱ្យក្រុមហ៊ុនធ្វើការជាមួយស្នងការដ្ឋាននគរបាលជាតិដើម្បីរៀបចំនិតិវិធីបន្តសុពលភាពនៃអនុស្សារណៈនេះ។ស្របពេលជាមួយគ្នានេះ សម្តេចក្រឡាហោម ត្រៀមខ្លួនជានិច្ចក្នុងការសហការជាមួយក្រុមហ៊ុនដើម្បីដោះស្រាយចំពោះបញ្ហាផ្សេងដែលអាចកើតមានឡើង៕
