ភ្នំពេញ ៖ ក្រសួងធនានទឹក និងឧតុនិយម បានបញ្ជាក់ថា នៅថ្ងៃទី២៧ដល់២៨តុលា ខែតុលា ឆ្នាំ២០២១ ខេត្តមួយចំនួនរបស់កម្ពុជា នឹងមានធ្លាក់លាយឡំជាខ្យល់កន្ត្រាក់នឹងមានជំនន់ទឹកភ្លៀងផងដែរ។
យោងតាមសេចក្តីជូនដំណឹង ស្តីពី ស្ថានភាពអាកាសធាតុរបស់ ក្រសួងធនធានទឹក នៅថ្ងៃទី២៥តុលា បានឲ្យដឹងថា បន្ទាប់ពីបានធ្វើការពិនិត្យ និងតាមដានជាប្រចាំលើស្ថានភាពអាកាសធាតុរួចមក បាន បង្ហាញឲ្យឃើញថា មានសម្ពាធទាបសកម្មមួយ បាននិងកំពុងស្ថិតនៅក្នុងសមុទ្រចិនខាងត្បូង។ តាមការព្យាករ នៅថ្ងៃទី ២៥ ខែតុលា ឆ្នាំ ២០២១ សម្ពាធទាបសកម្មនេះ នឹងវិវត្តជាបន្តបន្ទាប់ទៅ ជាវិសម្ពាធ ឬ កូនព្យុះ ដោយធ្វើដំណើរចូលដល់លើភាគខាងត្បូងប្រទេសវៀតណាម នៅថ្ងៃទី ២៧ ខែតុលា ឆ្នាំ ២០២១ ។ បាតុភូតខាងលើនេះ នឹងថមថយឥទ្ធិពលមកជាសម្ពាធទាប នៅពេល ដើរចូលមកដល់លើភាគខាងត្បូងប្រទេសកម្ពុជា ៕
