អ៊ុយក្រែន៖ រុស្ស៊ីបានប្រើមីស៊ីលនិងយន្តហោះគ្មានមនុស្សបើក វាយប្រហារទម្លុះតាមប្លុកផ្ទះល្វែង ក្នុងរដ្ឋធានីគៀវប្រទេសអ៊ុយក្រែន នៅថ្ងៃព្រហស្បតិ៍ទី២៨ខែ សីហាឆ្នាំ២០២៥ ដោយបានសម្លាប់មនុស្សយ៉ាងហោចណាស់ ១៤ នាក់ ក្នុងនោះមានកុមារចំនួន៣នាក់។ 

ទន្ទឹមគ្នានេះ ក្រុមមន្ត្រីបានព្រមានថា មនុស្សមួយចំនួនត្រូវបានគេជឿថាជាប់នៅក្រោមអគារដែលដួលរលំ ក្នុងការបាញ់ប្លោងមកពីទិសដៅផ្សេងៗគ្នា។ 

នេះជាការវាយប្រហារដ៏សាហាវបំផុតមួយនៅក្រុងគៀវ ដែលធ្វើឱ្យបាក់អគារជាពីរ។ កងទ័ពអាកាសអ៊ុយក្រែនបាននិយាយថា ទីក្រុងមូស្គូបានបាញ់បង្ហោះយន្តហោះគ្មានមនុស្សបើក និងមីស៊ីលចំនួន ៦២៩ គ្រឿងស្រោចលើតំបន់ស៊ីវិល។

សូមបញ្ជាក់ថា នៅក្នុងសេចក្តីថ្លែងការណ៍មួយនៅលើប្រព័ន្ធផ្សព្វផ្សាយសង្គម បេសកជនពិសេសរបស់សហរដ្ឋអាមេរិក លោក Keith Kellogg ថ្កោលទោសការវាយប្រហារនេះ ដោយកត់សម្គាល់ថា រុស្ស៊ីបានកំណត់គោលដៅ«មិនមែនជាទាហាន និងអាវុធទេ ប៉ុន្តែជាតំបន់លំនៅដ្ឋាន…បំផ្ទុះរថភ្លើងជនស៊ីវិល ការិយាល័យក្រុមប្រឹក្សាបេសកកម្ម EU និងអង់គ្លេស និងជនស៊ីវិលស្លូតត្រង់»។ ទាំងសហភាពអឺរ៉ុប និងអង់គ្លេសបានកោះហៅឯកអគ្គរដ្ឋទូតរុស្ស៊ី ដើម្បីតវ៉ាជាផ្លូវការចំពោះការវាយប្រហារលើទីតាំងការទូតរបស់ពួកគេ៕