បរទេស ៖ អ្នករាយការណ៍ពិសេសរបស់អង្គការសហប្រជាជាតិបានចេញលិខិតមួយយ៉ាងម៉ឺងម៉ាត់ ទៅកាន់រដ្ឋាភិបាលថៃ ដោយជំរុញឱ្យមានការបំភ្លឺលើចំណុចសំខាន់ៗចំនួន ១០ ទាក់ទងនឹងចំណាត់ការរបស់ថៃ ក្នុងការប្រយុទ្ធប្រឆាំងនឹងការជួញដូរមនុស្សឆ្លងដែនពាក់ព័ន្ធនឹងប្រតិបត្តិការឆបោកអនឡាញ នៅក្នុងតំបន់អាស៊ីអាគ្នេយ៍។នេះបើយោងតាមការផ្សាយរបស់កាសែត The Nationនៅថ្ងៃចន្ទ ២៣មិថុនានេះ ។

ក្នុងលិខិត ផ្លូវការមួយ របស់អ្នករាយការណ៍ពិសេសអង្គការសហប្រជាជាតិ ស្ដីពីទាសភាពសម័យទំនើប និងការជួញដូរមនុស្ស (ផ្ដោតលើស្រ្តីនិងកុមារ) ត្រូវបានផ្ញើទៅទីក្រុងបាងកក នៅថ្ងៃទី១០ ខែមីនា ឆ្នាំ២០២៥។ 

លិខិតនេះ បានគូសបញ្ជាក់ពីការព្រួយបារម្ភ ជុំវិញព័ត៌មានចារកម្ម ដែលបង្ហាញថា មនុស្សជាច្រើនមកពីជុំវិញពិភពលោក ត្រូវបានគេបោកបញ្ឆោតឱ្យចូលក្នុងការធ្វើពលកម្មដោយបង្ខំ នៅតាមបណ្ដាមជ្ឈមណ្ឌលប្រតិបត្តិការឆបោកតាមអនឡាញ។

មជ្ឈមណ្ឌលឆបោកតាមអនឡាញទាំងនេះត្រូវបានប្រើប្រាស់នៅក្នុងការធ្វើសកម្មភាពក្លែងបន្លំហិរញ្ញវត្ថុ (financial fraud), ការឆបោកដោយប្រើស្នេហា (romance scam), ការវិនិយោគទ្រព្យសម្បត្តិឌីជីថលក្លែងក្លាយ (fake digital asset investments) និងការលេងល្បែងស៊ីសងខុសច្បាប់ (illicit gambling) ជាដើម។ 

ក៏ប៉ុន្តែ លិខិតរបស់អ.ស.ប. បង្ហាញថា ថៃក៏ជាជម្រកនៃបណ្តាញជួញដូរមនុស្ស និងការឆបោកតាមអនឡាញដ៏ធំមួយដែរ នៅអាស៊ីអាគ្នេយ៍។

គួរបញ្ជាក់ផងដែរថា ប្រទេសថៃកំពុងក្លាយជាមជ្ឈមណ្ឌលរបស់មេដឹកនាំក្រុមឧក្រិដ្ឋជនសាយប័រ និងប្រតិបត្តិការឆបោកនៅតាមបណ្តាប្រទេសផ្សេងៗ រួមមាន ការកៀរគរមនុស្ស ការចាប់ជំរិត និងការជួញដូរមនុស្សពីប្រទេសថៃ ទៅដល់ទីតាំងប្រតិបត្តិការឧក្រិដ្ឋកម្មសាយប័រទាំងនោះ ដូចជាករណីពាក់ព័ន្ធទៅនឹងតារាសម្តែងចិនឈ្មោះ Wang Xing ដែលត្រូវបានជនឆបោកជួញដូរពីអាកាសយានដ្ឋានសុវណ្ណភូមិទៅកាន់ទីតាំងប្រតិបត្តិការឧក្រិដ្ឋកម្មសាយប័រដែលនាំឱ្យមានការធ្លាក់ចុះយ៉ាងខ្លាំងនៃទេសចរណ៍ចិន។ របាយការណ៍ទាំងនេះបានគូសបញ្ជាក់ថា ប្រទេសថៃគឺជាប្រភពក្នុងការផ្តល់មធ្យោបាយឱ្យពួកឧក្រិដ្ឋជនសាយប័រធ្វើប្រតិបត្តិការឆបោកទាំងនោះឆ្លងកាត់ទៅបណ្តាប្រទេសផ្សេងៗទៀតក្នុងតំបន់៕