មេបញ្ជាការយោធាមីយ៉ាន់ម៉ាលោក Min Aung Hlaing បានរៀបចំពិធីជប់លៀងអាហារពេលល្ងាចមួយនៅថ្ងៃសៅរ៍ ខណៈពេលដែលកងទ័ពរបស់លោកត្រូវបានគេរាយការណ៍ថា បានបាញ់សម្លាប់មនុស្សជាង ១០០ នាក់នៅតាមដងផ្លូវ និងបានបង្ខំឲ្យមនុស្សរាប់ពាន់នាក់រត់ភៀសខ្លួនចូលប្រទេសថៃ ក្នុងអំឡុងពេលចុងសប្តាហ៍នៃ ភេរវកម្ម និងការបង្ហូរឈាមដោយមិនរើសអើង ដែលត្រូវបានគេថ្កោលទោសជាអន្តរជាតិ។

រូបភាពដែលបានបង្ហោះនៅលើបណ្តាញសង្គមបានបង្ហាញថា មេដឹកនាំធ្វើរដ្ឋប្រហារស្លៀកពាក់ក្រវ៉ាត់ក និងអាវពណ៌សដែលមានមេដាយ ដើរលើកំរាលព្រំពណ៌ក្រហមស្វាគមន៍អ្នកចូលរួម និងអង្គុយទទួលទានអាហារដើម្បីប្រារព្ធទិវាកងកំលាំងប្រដាប់អាវុធ។

ថ្ងៃឈប់សម្រាកប្រចាំឆ្នាំរំលឹកដល់ការចាប់ផ្តើមនៃការតស៊ូរបស់កងទ័ពប្រឆាំងនឹងការកាន់កាប់របស់ជប៉ុននៅក្នុងសង្គ្រាមលោកលើកទី ២ ហើយរបបយោធាបានបង្ហាញ ការបង្ហាញកម្លាំងជាមួយនឹងក្បួនដង្ហែរយោធា។ ថ្ងៃសៅរ៍ក៏ជាថ្ងៃពេញមួយនៃព្រះច័ន្ទពេញវង់ដែលជាថ្ងៃចុងបញ្ចប់នៃប្រតិទិនតាមច័ន្ទគតិរបស់មីយ៉ាន់ម៉ា និងជាពេលវេលាដ៏សំខាន់មួយនៅក្នុងព្រះពុទ្ធសាសនា ដែលគួរតែត្រូវបានគេប្រារព្ធធ្វើពិធីបុណ្យ និងទៅកាន់វត្តអារាមនានា ផ្ទុយទៅវិញ ទាហាននិងប៉ូលីសបានចូលវាយលុក ដោយបានសម្លាប់មនុស្សយ៉ាងហោចណាស់ ១១៤ នាក់រួមទាំងកុមារផង នៅតាមទីប្រជុំជន និងទីក្រុងចំនួន ៤៤ នៅទូទាំងប្រទេសកាលពីថ្ងៃសៅរ៍ នេះបើយោងតាមការបូកសរុបរបស់ទីភ្នាក់ងារព័ត៌មានឯករាជ្យ Myanmar Now ។ វាជាថ្ងៃស្លាប់ច្រើនបំផុតចាប់តាំងពីកងទ័ពបានដណ្តើមអំណាចនៅក្នុងរដ្ឋប្រហារ ដោយបានផ្តួលរំលំរដ្ឋាភិបាលជាប់ឆ្នោតរបស់ប្រទេសនេះនៅថ្ងៃទី ១ ខែកុម្ភៈ។

តួយ៉ាង ប្រធានាធិបតីសហរដ្ឋអាមេរិកលោក ចូ ប៊ៃដិន បានចូលរួមបន្ទរការថ្កោលទោសអន្តរជាតិកាលពីថ្ងៃអាទិត្យដោយនិយាយថា ស្ថានភាពនៅក្នុងប្រទេសមីយ៉ាន់ម៉ាគឺ “អាក្រក់” ហើយបានពិពណ៌នាសកម្មភាពរបស់យោធាថា “ពិតជាគួរឱ្យស្អប់ខ្ពើមណាស់” ។ កាលពីថ្ងៃច័ន្ទ រដ្ឋបាលរបស់លោក ប៊ៃដិន បានប្រកាសផ្អាករាល់ការធ្វើពាណិជ្ជកម្មការទូតជាមួយមីយ៉ាន់ម៉ា។

ក្រុមតស៊ូមតិសម្រាប់សមាគមអ្នកទោសនយោបាយ (AAPP) បាននិយាយថា ពេញមួយថ្ងៃច័ន្ទ ការបង្ក្រាបនិងការបាញ់ប្រហារបានបន្តនៅទូទាំងប្រទេស ហើយយ៉ាងហោចណាស់មនុស្ស ១៤ នាក់ត្រូវបានបាញ់សម្លាប់។ មកទល់ពេលនេះ យ៉ាងហោចណាស់មានមនុស្ស ៥១០ នាក់ត្រូវបានសម្លាប់ចាប់តាំងពីមានរដ្ឋប្រហារកើតឡើង។

ទន្ទឹមនឹងនេះដែរ នាយករដ្ឋមន្រ្តីថៃលោក ប្រាយុទ្ធ ចានអូចា បាននិយាយថា រដ្ឋាភិបាលរបស់លោកបានត្រៀមសម្រាប់ការហូរចូលជនភៀសខ្លួនពីប្រទេសជិតខាង មីយ៉ាន់ម៉ា។ លោក ប្រាយុទ្ធ បាននិយាយនៅក្នុងសន្និសីទសារព័ត៌មានមួយថា "យើងបានរៀបចំកន្លែង ប្រសិនបើការហូរចូលកើតឡើង (ដូច្នេះយើងដឹង) កន្លែងណាដែលត្រូវទទួលពួកគេទុក" ។ យើងមិនចង់ឲ្យមានការហូរចូលក្នុងតំបន់របស់យើងទេ ប៉ុន្តែយើងត្រូវតែយកបញ្ហាសិទ្ធិមនុស្សមកពិចារណា។

គួររំលឹកថា មនុស្សប្រមាណ ៣.០០០ នាក់បានភៀសខ្លួនចេញពីតំបន់ការ៉ែនភាគអាគ្នេយ៍របស់មីយ៉ាន់ម៉ានៅលើព្រំដែន ទៅប្រទេសថៃកាលពីថ្ងៃអាទិត្យ បន្ទាប់ពីយន្ដហោះយោធាបានធ្វើការវាយឆ្មក់ទម្លាក់គ្រាប់បែក នេះបើយោងតាមអង្គការស្ត្រីការ៉ែន (KWO) ដែលប្រតិបត្តិការនៅក្នុងរដ្ឋការ៉ែន និងជំរំជនភៀសខ្លួនក្នុងប្រទេសថៃ។